Wanpela helikopta i pundaun long solwara long Niu Ailan

Wanpela helikopta i bin bungim birua na pundaun long solwara klostu long Niu Ailan provins.

Dispela i bin kamap las wik Fraide (Septemba 13, 2019).

Pailot bilong dispela helikopta em wanpela man bilong Sauten Hailens nem bilong em Phil Emeck.  Na em I bin dai.

Facebook: Phil Emeck i sanap namba tu stat long han kais wantem ol narapela pailot

Em i bin flai long Buka igo long Tokua (Kokopo) long Is Niu Briten taim em i bungim birua.

Nau yet ino gat ripot i tok aut stret long wanem has tru na birua I kamap.

Tasol wanpela man bilong stretim balus i bin stap long helikopta tu na em ino bin dai.

Bosman na pailot bilong Manolos balus kampani Jurgen Ruh husait tu i bin flaim helikopta bilong em semtaim i tok em bin lukim helikopta bilong Phil ol i flai long samting olsem 200 fit antap long solwara taim em i bin go antap long 5600 fit.

Sampela taim liklik bihain em ino lukim helikopta na em i ting ol i lend long wanem igat strongpela win na planti kilaut.

Bihain em i kamap long Tokua na harim sampela ripot olsem igat hevi i bin kamap na em i kisim narapela helikopta igo bek long halivim.

Phil Emeck i bin go long Buka long flaim Praim Minista James Marape na Bougainville President John Momis na ol narapela gavman minista igo long Buin long wanpela miting.

Tasol ol i senisim dispela miting na em i bin laik kam bek taim em i bungim birua.

Em i bin wanpela bilong ol ami pailot ol i bin trenim ol  long Australia long flaim balus na helikopta.

Na em i bin flai long taim bilong pait long Bougainville na bihain i pinis na joinim ol narapela kampani olsem Helifix na Heli Solutions.

Em igat planti eksperiens long flai long kantri.

 

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.