Tok Pisin Nius

Bikpela kot long Pot Mosbi i wok long painim aut sapos boi fren bilong bipo Mis PNG i bin kilim em i dai

Wanpela kot i wok long go het long Pot Mosbi.

Dispela kot i laik painim aut sapos boi fren bilong wanpela meri Ruby-Anne Laufa i bin kilim em o nogat.

Ol i bin singautim sampela witnes manmeri long givim toktok long kot na hap aste boi fren, em ol i ting i bin kilim Ruby i givim toktok bilong em long kot.

Richard Namaliu husait i bilong ples Raluana long Is Niu Briten i tok Ruby igat hevi long dring planti bia na ol ripot ya i stap wantaim Pasific Intanesel Hausik.

Planti man i kirap nogut tru taim em i tok aut long dispela.

Em i bin tokim kot em bin paitim Ruby wanpela taim tasol and Ruby yet i bin kalap igo daun long ka taim em i ron spid stret, olsem na Ruby i dai.

Ol sampela witness i bin tokim kot em i bin paitim em planti taim.

Long aste moning kot jas igo long hap meri ya i bin bungim birua long en long Yunivesiti bilong Papua Niu Gini.