Tok Pisin Nius

Wanpela skul long West Sepik ino gat mani long statim skul

Wagesu Praimeri Skul tisa long Nuku Distrik Joseph Yeki i tokim Post Courier niuspela dispela wik, skul igat 56 toya tasol long benk.

Vanimo Town Facebookpic

Dispela mani em i stap olsem stat long las yia yet.

Em i tok dispela TFF skul fi mani gavman i save givim- em ol i kisim bilong 2017 yia tasol na ol i yusim pinis long 2018.

Bihain long dispela, ol ino moa kisim wanpela TFF mani.

Mr Yeki i tok ol i bin traim hat tru long toksave long skul inspektas na provinsol edukesen opis long Vanimo tasol ino gat wanpela halivim ikam.

Wagesu Praimeri Skul istap arere long Sipik Haiwe na igat 200 sumatin na sikispela ol tisa.

Ol tisa i save yusim mak mani olsem K5000 wanwan yia long baim ol samting bilong tis na ol i save putim gut rekot we ol i save baim ol samting.

Long nau yet Mr Yeki i tok skul ino gat ol buk samting bilong tisim dispela ‘standard based curriculum’.