Brata bilong Praim Minista i kisim sut long banisim em yet long binatang bilong korona

Bipo Praim Minista Peter O’Neill husait tu i memba bilong Ialibu-Pangia long Sauten Hailens provins ino amamas olsem brata bilong James Marape i kisim sut long banisim em yet long binatang bilong korona.

Em i bin tokim wanpela niuspela long Ostralia olsem dispela em i soim olsem brata bilong James Marape, Lasen i kalapim lain.

Samting olsem 8,000 AstraZeneca sut bilong banisim ol manmeri long binatang bilong korona i bin kamap long kantri long las wik.

Na ol i bin tok ol nambawan manmeri long kisim em bai ol wok manmeri long hausik na ol narapela grup husait i wok hat long stopim sik korona.

Opis bilong Praim Minista i bin tokim dispela niuspela long Ostralia olsem Lasen, bipo i wanpela man bilong pilai ragbi i save wok wantaim ol lain i save was gut long Praim Minista James Marape taim em i mekim ol wokabaut bilong em.

Planti ol manmeri husait i hamamas olsem dispela tambu sut i kamap pinis long kantri ino hamamas tumas long ritim dispela ripot.

Ol i toktok long intanet olsem ol wok man meri long haus sik i mas nambawan lain long kisim sut tasol sampela i tok ol ino hamamas long dispela niuspela ripot we i laik bagarapim nem bilong James Marape.

READ  Bikpela sik i kam olsem long Saina na gavman i putim sampela lukaut long ol ples balus na rot igo kam long narapela kantri

Ol i sapotim Lasen na tok em i save go pas na was long James Marape na em i mas kisim sut bilong korona.

Praim Minista James Marape, NCD Gavana Powes Parkop na ol narapela gavman minista i bin kisim sut bilong banisim ol yet long binatang bilong korona long Tunde.


Be the first to comment