Gavman i surukim miting bilong Palamen igo long mun Ogas

Oposisen bai kisim gavman igo long kot

Gavman is surukim miting bilong Palamen igo long mun Ogas.

Praim Minista James Marape i tokim ol nius ripota tete olsem sik Korona i go antap na samting olsem 40 manmeri husait i wok long Palamen igat dispela sik.

Olsem na bihainim dispela ripot, ol i surukim miting bilong Palamen ol gavman bai wok wantaim ol gavana bilong provins na daunim sik Korona.

Tasol oposisen ino hamamas long wanem tingting bilong ol long muvim vot ino gat bilip na rausim gavman bilong Marape nau bai popaia.

Oposisen lida Belden Namah na bipo Praim Minista Peter O’Neill i tok kantri ino stap long gutpela mak na i luk olsem klostu bai nogat mani stret long mekim ol wok kamap long wanem planti mani bai igo long dinau.

Taim gavman i surukim miting igo long Ogas, em bai min olsem ol oposisen bai ino nap senisim gavman.

Lo i tok 12-pela mun bifo long narapela ileksen em i tambu long senisim Praim Minista.

Ol man i ting gavman i bin poret long dispela vot ino gap bilip na muvim taim bilong miting tasol Marape i tok em ino tru.

READ  Wanpela helikopta i pundaun long solwara long Niu Ailan

Ol oposisen bai askim kot long tok aut sapos dispela i orait o nogat.

Peter O’Neill i tok i luk olsem Palamen ino sindaun long miting bihainim namba bilong ol de em lo i tok ol imas sindaun.

 


Be the first to comment