Ol kakao fama long Sandaun laikim kampani bilong baim kakao i stap long Vanimo
Wanpela bisnis grup long Sandaun husait igat ol kakao fama i save salim kakao long ol i laikim wanpela bisnis bilong baim kakao i mas stap long Vanimo.
Ol man meri bilong Walsa Kakao Koporetiv Sosaiti – namba bilong ol i sanap long 67 i stop long mekim wok kakao na salim gen long koporetive sosaiti long wanem i hat tru long bringim ol kakao igo long Vanimo na narapela hevi em ol ino nap long salim long Indonesia.
Ol wok man bilong Kastams na Kwarentin i tokim ol long kisim wanpel kakao ekspot laisens pastaim.
Mausman bilong ol husait tu i wanpela tisa, Andrew Dahai i tok ol dispela salens i wok long stopim ol.
Tasol ol bai baim gen kakao long niupela yia 2020.
Ol i bin salim klostu olsem sikis raun long Indonesia taim ol ino stopim ol yet na ol i mekim bikpela mani mak long K16,000.
Planti manmeri taim ol i salim san drai kakao bin, ol i save kisim olsem K60 igo inap long mak bilong K300.
Dispela mani Andrew i tok ol i save yusim long baim kaikai olsem sol na suga long stua bilong koporetiv sosaiti na sampela ol i baim skul fi bilong pikinini.
Bikpela bel wari bilong ol nau em i mas gat kampani bilong baim kakao istap long Vanimo.
Namba tu wari em long i mas stretim rot igo long Vanimo.
Long nau yet ol i save ron long faiv aua na kar i save bamp bamp igo long Vanimo.